ولا مرة قال لي انه فخور فيي.
ولا مرة قال لي انه بحبني.
بس جواتي بعرف انا شو بالنسبة له. بعرف اني نقطة ضعفه. بعرف انه بس بده يشكي (نادرا جدا جدا) بيفتحلي قلبه وبالغلط وبلحظة ضعف سريعة بيظهر عن عواطفه ووجعه.
بعرف شو في جواته حتى لو ما بيحكي. بعرف خوفه عليي. بحياتي ما حدا خاف او رح يخاف عليي متله. بعرف اني تعبته بجنون شغلي. بعرف انه بس كون بعيدة ما بنام.
بعرف اديش هو حنون. بعرف انه بس يصرخ فينا هو لانه خايف علينا ولمصلحتنا.
لما جيب علامة عالية يسألني ليش ما جبت اعلى. كان لازم دايما حط هدف اعلى واوصل له وارجع حط هدف اعلى. ممنوع الرجوع.
لما كنت على وشك الفشل بالجامعة وكان بدي اترك الهندسة صرخ فيي وقال لي: “انا ما ربيتك تتستسلمي”.
ولا مرة حسسني اني عايزة. رباني راسي مرفوع وما اطلب شي من حدا بس اذا حدا طلب شي اركض كرماله. علمني اتكابر على الوجع والشعور وفكر بمنطق.
يمكن غلط او يمكن صح بس هيك علمني.
ينعاد على كل اب بالهدنيا. هو الدنيا اصلا.
دينا الحجار
Dina Hajjar 