تعبت يا لبنان…
أنت تعبت وأنا تعبت يا لبنان…
تعبت من الناس عالطرقات يلي بتتخلق على بعضها… حتى بأيام الأعياد وبوقت بدب الإيمان بالجميع، الناس بتضل أخلاقها زفت مع كامل الإحترام لبعض الناس القلائل المحترمين…
تعبت من الزمامير والإزعاج والمسبات…
تعبت من المستعجلين على كل شي وهني دايماً مأخرين… لك على شو مستعجلين؟
تعبت من هالختيارة يلي كانت عم بتسوق متل المجنونة ورح تكسر كل السيارات وتخبص البني ادمين…
تعبت أنا ومحتارة بين أنه أغضب عليها أو أشفق عليها أو طنشها وقول معليش، الله يعين…
تعبت من رصاص الإبتهاج… على شو مبتهجين؟ على قانون ضمان شيخوختكم؟ أم قانون السير المطبق؟ أم العفة بالدوائر الرسمية؟ أم الأيادي النظيفة يلي عم تنهض بالبلد؟ على شو؟ فهموني لأني حابة أفرح معكم كمان…
تعبت من الناس يلي ما بتفكر إلا بنفسها… من بعد حميرهم ما ينبت حشيش…
تعبت من الناس يلي بتفكرك غبي لأنك ساكت عن أخطائهم… تعبت لأنه بمواقف الغدر، إذا طنشت بقولوا بلا شخصية وإذا رديت بقولوا عقلها صغير…
تعبت من الناس يلي بتاجر بالناس ووجع الناس وبيطلعوا على الإعلام أبطال بس لأنهم تصوروا مع طفل مشرد او مع أرملة موجوعة…
تعبت من فكرة الإنسانية بزمن الحيوان عنده إنسانية أكثر… بزمن الكلب أوفى صديق… بزمن القرد بحن على طفل أكثر من أهله… بزمن الواوي سكت والبشر عم بجعروا…
تعبت من الشعب يلي كله مسخرة بمسخرة ولما يتمسخروا عليه بيضحك… صدق المثل: بتبزق بوجهه بقول الدنيا عم تشتي…
تعبت من الشعب يلي بيضحك للسواح وبيقلب خلقته على أهله…
تعبت من سطحية شعبك يا لبنان… من غبائه ووسخه…
تعبت اركض ورا الناس لمصالحم… تعبت من استهتارهم وتعبت من تحمل المسؤولية على ناس مش فارقة معهم…
تعبت من الناس يلي بتسأل بس لما يكون بدها شي…
تعبت من الكذب والتصنع والعيش ب-100 وجه… من الشعب المخدر… من الشعب الأناني…
تعبت من تنظيمك المدني السيء السيء السيء…
تعبت من ريحة الصدي، من ريحة العفونة، من ريحة الحرب…
تعبت غنيلك إني بحبك يا لبنان… تعبت لأنه منشف دمي بس شوف أرضك عم تحترق وأنا بعدني عم بحلم فيك أجمل وأحلى…
تعبت من النطرة… نطرة شي إنفجار يهز الشعب… نطرة أمل… نطرة بطل يخلص لبنان… نطرة القيامة…
تعبت من حبك يا لبنان… تعبت منك يا لبنان… أنت مرض عم ياكل كياني…
أنت مرض يا لبنان… وتعبني مرضك…
دينا الحجار
Dina Hajjar 
Touché.
unfortunately…
Love it! and the sad part is all of this is true.
Thank you Joe!