سلم عليها يا ملحم…

الموسيقار رحل. ربينا على صوته والحانه واغانيه. ما في شك انه هو كأنسان كان مثير للجدل بآرائه وبتصرفاته وبتعاطيه مع الناس. مش مهم تحبه. مش مهم تحترمه ولا مهم توافقه بالرأي. انا ما بهمني رأيه بمختلف المواضيع وما بوافقه على كل آرائه بس ما فيك ما تحترم فنه وعبقريته بالفن.

 ما حدا منا ما عنده اراء مختلفة او مثيرة للجدل بس مين بيناتنا قدر يعمل ربع يلي عمله ملحم بركات.

وعلى الصعيد الشخصي ملحم بركات تركلي ذكريات قديمة جميلة مزينة بالحان حلوة ومرة و ما بتمرق صورة ستي براسي بلا ما ترافقها اغنية “تعا ننسى“. ستي كانت تحط المسجلة وقت نكون عندها بـالصيف وتسمع ملحم بركات وتبتسم ابتسامة خجولة عالاغنية. ملحم بركات قدر يخلي ستي تبتسم. ستي يلي قسيت عليها الدنيا وخلت البسمة غايبة عن وجهها وحاولت تنسى ايام العذاب المرة والسنين يلي ضاعت.

شكرا ملحم بركات. شكرا لانه بفضل الاغاني ما رح انسى ايام حلوة وكل ما إسمع اغنية رح ترجع صور جميلة وتخليني ابتسم واتذكر قديش حلوة البساطة والبراءة والصدق والوفاء والحنان والكرم وكل الصفات الحلوة يلي كانت مخباية ورا ابتسامة ستي الخجولة.

شكرا لانك زرعت بسمة على وجه ستي الحزين.

شكرا لان كل ما اتذكر شي حزين بسمع اغنية “تعا ننسى” وبشوف ستي بصوتك وبترجع ذكريات جميلة وبنسى كل يلي “حكيوا علينا واللي بكوا عينينا وكل يلي ظلمونا “.

شكرا. سلم يا ملحم على ستي. سلم عليها.