أهلي بالشمال…

أنا بنت الشوف على الهوية  بس أنا بنت كل منطقة بلبنان ومنطقة الشمال بالأخص بتعز على قلبي  بعد حوالي سنتين شغل بالمنطقة مع اهلها يلي ماحسسوني انني غريبة عنهم واحتضنوني كأني بنتهم.

بوقت الناس مشغولة  بالمعارك الانتخابية والأحزاب والعنصرية الطائفية  ومين بده يربح أكثر أصوات، قلبي على الناس يلي اخترب بيتها من ورا معارك دم طلعوا الضحايا الابرياء والمعترين يلي ما إلن غير الله وأكيد الله بيكفي بس حرقة القلب بتوجع.

قلبي على أصوات سكتت من ورا معارك صنعوها يلي ماشبعو مصاري ودم، قلبي مع كل أم بالتبانة احترق قلبها على ولادها، قلبي مع كل يتيم بجبل محسن، قلبي مع كل مريض بالمنكوبين، قلبي مع أهل الكرم بعكار بالرغم من عزلهم عن الخريطة …

قلبي مع كل طفل ماخلوا يلعب… قلبي مع كل  ختيار مش قادر يجيب دوا… قلبي مع كل منصاب مش قادر يشتغل ويطعمي عيلته…

قلبي مع الحجة فطوم اللي صار صوت الخيال يخوفها من كتر ما سمعت صوت قذايف، قلبي مع أم علي وابو علي يلي خسروا فاطمة برصاصة مجرمين ما إلهم رب، قلبي مع أبو عدي يلي احترق قلبه على روح عدي، قلبي مع ابو جهاد يلي احترق بيته وما حدا طل وسأل، قلبي مع سميرة وبنتها يلي قالولي: “اتمنينا حدا من هالجمعيات أو المؤسسات أو الوزارات  يجي لعنا ويسألنا “كيفكم”. كلن بيجوا بيسألونا عن حجم الأضرار وعن تقديرها وما حدا سأل عن الأضرار يللي صابتنا نحن البني آدمين. نحنا ولا شي… الحجر أهم من البشر”… قلبي مع الحج  المرعبي يلي استقبلنا استقبال الشرف بمنزله الاثري بعكار بلا ما يطلب شي غير”سلامتكن”… قلبي على أهل الضيافة والكرم بعكار، على الناس الطيبة يلي اهتموا بهالغريبة يلي كان شغلها تهتم فيهم، على صورة لبنان الحقيقية  يلي منقرأ عنها بكتب قديمة…

قلبي مع كل بيت خرقه رصاص الغباء والجهل، قلبي مع أحلى ناس، مع أطيب ناس وأقوى ناس… انتو عطيتوني أحلى أيام بالرغم من قسوة الزمن عليكم… بس الحق مابعمره بموت وبتمنى تعيشوا أيام أحلى بالرغم من كثرة الندوب وذكريات الألم…

دينا الحجار