حدا بس يقلي شو صاير ببلدي… شو صاير ببلد العيد على قولة الست فيروز… شو تغير بـ 10 سنين… كيف خدرونا وما حسينا بالتدهور المخيف بهالسنين؟؟ 10 سنين من انهيار شامل للوطن وما بسمع عالاخبار الا ناس عم تسأل عن الدولة وعن غيابها …بس بصراحة مش دائما الحق عالدولة… معليش اسمحولي فيها…
بلا تهرب من المسؤولية… مش دائما القدر سبب الفشل ومش دائما الدولة سبب تدهور البلد… وراء القدر في جهد شخصي فينا نعمله ونغير مسار الأمور ووراء الدولة مفروض يكون في شعب بيشتغل على تحسين وطنه… مفروض ولكن…
نحن شعب التنبلة… نحن الشعب المستورد مش المصدّر… نحن الشعب يللي بده دائما تجي الشغلة لعنده… نحن الشعب يللي همه مصلحته الخاصة وبس… اذا بردان بيحرق الغابة كلها تيتدفى وبينسى انه تحت شجرة من هالغابة رح يندفن…
سؤال بطرحه عليكم: شو الفرق بيننا وبين اللاجئين السوريين أو الفلسطينيين؟ اكيد في فرق وكلكن فيكن تلاقوا فرق من مختلف النواحي… اما أنا رأيي انه الفرق يا أبناء وطني انه هني خربانة ببلادهم وإذا راق الوضع بيرجعوا إليها حتى لو كانت أنقاض مشان يرجعوا يعمروها… اما نحن فمنعمر لندمر ومنخرب بلدنا تنفل… نحن مامنعمر الا بالاغاني… زهقت تقولولي راجع يتعمر لبنان … امتين راجع؟ لما نحن نروح؟ نحن ببلدنا وما منعرف الانتماء… منتغرب ومنحس حالنا غرباء ومنرجع ومنعمل حالنا غرباء… نحن ماعنا انتماء… نحن وبالعربي اللبناني بلا أصل…. بعدين إذا لحقنا وعمرنا فـيا لطيف على المجازر العشوائية والبناء الغير مدروس وناطحات السحاب … على شو عم بتعلو العمار؟ صحيح الحق على يلي بيعطي رخصة بس كمان على يلي عم يرسم المخططات وينفذها بلا ضمير…
بالمناسبة الكهرباء شو؟ صرنا بال 2015 وبعدنا منحكي بالكهرباء… عيب… والمياه؟ وشبكة المجارير؟ عيب… عيب… وإذا صار عنا كهرباء ماعاجبنا… يا اخي شو بدنا نحنا؟؟؟
اما عن الزبالة… يا اخي شو خص تلوم الدولة اذا أنت بتكب كيس زبالتك من شباك السيارة وبتنق أنه الشارع وسخ؟؟
اما عن التجميل وما ادراك ما التجميل في بلدي… التجميل صار تغيير شامل… عقد وعقد وعقد كثيرة أهمها عقدة النقص مع انه عنجد ما ناقصنا شي… نسينا معايير الصحة ومعايير الأخلاق ومعايير الإنسانية وركزنا على معايير التجميل والتغيير… رخصنا كتير يا بلدي…
اما عن السواقة نحن اللبنانيي دائما مستعجلين بس على شو؟ منمشي بسرعة ومنسوق بسرعة وما منخلي حدا يسبقنا أو يمرق قبلنا… بس بعد لا هلق مابعرف على شو مسعجلين؟ السواقة اخلاق … هيدي الجملة بتختصر حكي كتير…وعم بسمع الناس عم تحكي عن قانون السير الجديد… في منهم بيقولوا “وأخيرا صار في قانون”… بحب ذكركن انه بلبنان في كتير قوانين ومن زمان موجودة… من أيام الفرنساوي ومن ايام باشاوات العثمانيين…بس نحن جاهلين… مامنطبق القوانين الا لما توجعنا جيبتنا… صحيح أنا سعيدة بالقانون الجديد عسى المصروع يدفع مصاري كتير بدل مخالفته للقانون أحسن ماشبابنا يدفعوا حياتهم مقابل طيشه وصرعه بس أنا على امل يطبق ضمن خطة شاملة بيجي معها طرقات صالحة للسيرمع تنظيم مدني مدروس ومنطقي (يعني مثلا جسر بنص الطريق بده بس منطق تيعرف الواحد أنه تنفيذه مصيبة)٬ اشارات سير شغالة٬ نظام تنقل آمن مع محطات منظمة ومدروسة (يعني أنا أكيدة يلي بده كل يوم 4 ساعات تيوصل على شغله من ضبية لجل الديب مارح يكون عنده مشكلة لو في باص منظم يأخده ويرده (٬جسور عبور للمشاة مع درج كهربائي أو مصعد لانه شعبنا يللي بيضل 5 ساعات بالجيم ما الو جلد يطلع درج تيقطع الطريق٬ كمان على أمل مثل ما ازالوا الحواجز والعوائق من المدينة أنه يفتحوا الطرقات يلي مسكرة لسبب او لشخص ويزيلوا كل العوائق على الشعب… كل العوائق كلها كلها…
أما عن الصحة… الملف صار بالإعلام… والضمير مات…
اما عن الاعلام… سباق مين بـجيب أسرع الاخبار السيئة للشعب والشعب اخر همه لانه تمسح وتعوّد…
اما عن الثقافة وبلد المثقفين… ثقافة همها ثلاثة شقيقات عم يتخانقوا على لون السكربينة على التلفزيون… ثقافة همها قديش عمر هيفا… ثقافة مابتضحك الا على المسبات… ثقافة مابتقرأ الا الأبراج… ثقافة بتنسى ابداعات شبابها بالخارج…
أما عن الرياضة… حتى الرياضة… حتى الرياضة يا أبناء وطني؟؟؟
والملفات كثيرة كتير والحكي ببلاش بس الاهم الحل والتنفيذ والحل هو ضربة كف لشعبنا النايم… ضربة كف للنقيقة تيعملوا شي بفيد غير النق… ضربة كف للغاطس بالكوما… وحاج بقى تهرب من المسؤولية ولوم الدولة… “كله الحق عالدولة”… خلص بقى حكي بالهوا وكب اتهامات للتهرب… كلنا الحق معنا وكلنا الحق علينا والحل يبدأ بابتسامة للجار٬ وشوفوا كيف بيتغير البلد مثل تأثير الفراشة على الاعاصير…
Dina Hajjar 