بالزمانات ايام المدرسة، كان يكون عنا فرض اسمه “املأ الفراغ”، يعطونا مثلا جملة “اكل الولد …” وكان علينا نملأ الفراغ بالمفعول به…وياي شو طلعنا كلنا شاطرين لأنه كلنا منعرف إنه هالولد ماغيره (الفاعل) مابياكل (الفعل) الا هالتفاحة ماغيرها (المفعول بها)… ممنوع ياكل قرنبيط مثلا… لازم تفاحة… ومن وقتها لهلق منطعمي هالولد التفاحة هي ذاتها ومستمرين بحياتنا اليومية منعمل فرض املأ الفراغ…
يعني مثلا صارلنا فترة منسمع بالفراغ الرئاسي… وبعدنا عم نحاول نملأ هالفراغ ونتحزر مين بده يقعد على هالكارثة… عفوا الكرسي… ووصلنا لمرحلة انه هالفراغ )أو مثل ماسميناه فوق: المفعول به ( فارغ … يعني لو ملأنا الفراغ أو تركناه فارغ ما بتفرق… البلد ماشي بكل الاحوال… وصار الفاعل يلي بده يملأ الفراغ الرئاسي هو ذاته مفعول به… بالتوفيق يا ريس…
اخبار لبنان ممنوع تكون فارغة من الاكشن والتكسير والضجيج الخ… ممنوع تكون الأخبار مثلا: “لأول مرة من 100 سنة سمع اهالي بيروت صوت زقزقة العصافير “ لازم تكون الاخبار مثلا : “قامت عصابة بخطف قتل ذبح … ” لازم كل السكوبات الاعلامية تكون مأساوية درامية … لازم… هيدا الفرض هيك بقول… بس بالمقابل الواحد لازم يقول الحق: الاعلام عمل توازن ذكي: اخبار حرزانة مقابل بعض البرامج الفارغة… وبس…
كمان اذا في شقفة ارض ممنوع تكون فارغة.. لازم نعملها مزبلة أو نعمر ناطحة سحاب أو أحسن وأحسن: نعمر ناطحة سحاب من الزبالة … يعني صار في مكبات زبالة بكل قرنة فارغة بالبلد… دخلكن على شو بعدكن عم تشكو ؟ محلولة قصة الزبالة… عنوان الخطة: املأ الفراغ بشوارع المدينة للتخلص من النفايات… آه وعلى فكرة اجمالا فينا نعتبرانه الشجر والانهار والبحر فراغ… من جهة اخرى، اذا ماملأنا الارض بالزبالة فينا نعمربناية ولازم نقدر نشوفها من مرسيليا… ممنوع تكون اقل من 40 طابق … العترة بس على يللي ساكن بالطابق 40 لما تنقطع الكهرباء وينقطع مازوت المولد …بس على كل حال هون مافي خطر… الكهرباء والمازوت بعمرن مابينقطعو… الدنيا بالف خير…
كمان وكمان لما تكون ماشي بالسيارة على خط الشمال لأنه بدك ترجع تاخد كوع الشمال وخط اليمين حدك فاضي بتروح عاليمين تتملأ الفراغ لانه قلبك الصغير لا يتحمل فراغ عالطريق وبعدين بتكسر يا شاطر عالشمال لتفرق قدام سيارات خط الشمال وبلا إشارة … شطارة يا زلمي لازم نملأ الفراغ… لازم…
بجلسة اصدقاء ممنوع يمرق أكثر من 10 ثواني سكوت… لازم نملأ الفراغ حتى لو بأسخف المواضيع أو بتكرار المواضيع السابقة… لازم…
على فكرة بعدني عم بكتب تيكون المقال يملأ فراغ صفحة كاملة مع انه الفكرة وصلت وفي كتير حكي ما الو عازة… وبعدني عم بكتب لانه لازم املأ الفراغ… لازم…
بس بالختام اتمنى انه كلنا يعني كلنا (مني وجر) نملأ فراغ الراس… لأنه لما نملأ فراغ الراس مابعود في شي اسمه فراغ… هيدي عنجد لازم نملأ الفراغ والباقي كله كلام فارغ… وبعتذر سلف عن كلامي الفارغ…
دينا رفيق الحجار
Dina Hajjar 