الحق على مين؟ الحق مع مين؟
ما بعرف من وين بلّش ورقة النعوة. فيني اشكي على الشغل والوضع المادي أو على المشاريع الضخمة يللي بخدرونا فيها وقت الانتخابات، وفيني اشكي على الاخلاق المفقودة والسواقة المجنونة على الطرقات، وفيني اشكي على خريطة تضاريس لبنان الجديدة يللي دخلت فيها جبال الزبالة الشاهقة والكسارات يللي أكلت جبال لبنان الطبيعية، وفيني اشكي على الكهرباء والماء والبنزين، وفيني اشكي على كل سياسي مهم بركب كم كلمة بجملة عالتلفزيون وبطلعلنا الضغط بـ5 ثواني…
بس الأهم يللي محيرني: على مين بشكي؟ على السياسيين أم على الشعب؟ ضاعت الطاسة وما بقا عارفة الحق على مين أو الحق مع مين؟ عالشعب؟ عالسياسيين؟
من وين بلش؟ وليش بدي اشكي؟ عم فتش عحق ضاع بجوارير الدولة… ولووو شو في جوارير بهالدولة! عم فتش عحقي وحق ولادي وأولادهم يعيشواعيشة بني آدم بهالارض وبهالبلد. ما بدي ولادي يربوا على الطقم السياسي الفاشل يللي عم نتحمله نحنا ولا بدي ولادي يربوا بجو شعب بيكره بعضه عالهوية. ما بدي ولادي يربوا عفكرة إنو الحق معهم وغيرهم جاهل ما بيعرف شي. ما بدي ولادي يتبهدلوا على بواب السفارات وما يقدروا ياخدوا فيزا سياحية على دولة شقيقة. ما بدي ولادي يعيشوا بتمديد قصري ولا بدي ولادي ينسرق منهم عمرهم كله تيضل معهم حق دوا لآخرتهم لأنو ما عندن نواب يأمنولن آخرة انسانية.
بدي بس افهم كيف بـ10 دقائق نوابغ مجلسنا… عفواً نواب مجلسنا قدروا ياخدوا هيك قرار بتمديد صلاحياتهم ويللي بناسبهم و30 سنة ما كانت كافية لياخدوا قرار بايخ متل ضمان الشيخوخة أو تنظيم السير مثلاً… كتير عليكن البندورة… وحياة تراب هالبلد كتير عليكن البندورة… يلا كلو منيح، بالنتيجة مع تمديد المجلس لسنة ونص رح يتمدد تزفيت الطرقات لسنة ونص بركي بزفتولنا هالجورة قدّام البيت…
خلصوا كلماتي وبعدني لهلق ما عارفة من وين بلش ووين بدي خلص ولا عارفة الحق مع مين ولا الحق على مين…
دينا الحجار
Dina Hajjar 